Во пресрет на утрешната собраниска седница, министерката Гордана Јанкулоска до вработените во Одделот за обезбедување упати инструктивна телеграма во која меѓу другото се вели:

На овој начин би сакала уште еднаш да ги предупредам сите вработени во Одделот за обезбедување да не подлегнуваат на потенцијални провокации и да продолжат да се однесуваат професионално согласно законите и правилниците за постапување.

Доколку и се случи некоја провокација, полициските службеници повторно треба да ја задржат присебноста и не смеат да го спуштат нивото и да возвраќаат со сила. Треба да се задржи вербата дека постои институционален начин за лоцирање на одговорноста и санкционирање на виновниците.

Свесна сум дека може да делуваат депримирачки обидите да се избегне и префрли одговорноста во случај кога сите докази јасно покажуваат кој се однесувал недолично, кој влечел, кој туркал и кој попречувал извршување на службени задачи. Свесна сум дека може да делува депримирачки тоа што Секторот за внатрешна контрола при секој пропуст направен од полициски службеник покренува дисциплинска постапка, а во случајов една недела по вандалскиот напад не само што нема одговорност, туку учесниците продолжуваат со неаргументираните обвинувања.

Би сакала да ве уверам дека ќе сториме се што е во рамки на законот инволвираните во инцидентот да сносат соодветна одговорност. Доколку е некаква утеха, треба да знаете дека изминативе денови целата домашна и меѓународна јавност се увери кој се однесувал професионално, а кој се обиде насилнички, со раце, да дели сопствена правда.“